Saan ang lakad mo?

By in Altapresyon, Diabetes, Kolesterol on August 5, 2015

Lagi itong sinasabi ng doktor. Kailangan ng ehersisyo! Isa sa pinakamadaling gawin ay ang maglakad.

Ayon sa American Heart Association, ito ang mga benepisyo ng paglalakad:

1. Bawas sa risk o peligro ng sakit sa puso (coronary artery disease kung saan nababarahan ng cholesterol plaques ang mga ugat)

2. Pagbaba ng blood pressure sa altapresyon at asukal sa dugo sa diabetes

3. Pagbaba ng bad cholesterol (LDL) at pagtaas ng good cholesterol (HDL)

4. Pag-maintain ng tamang timbang o para hindi tumaba

5. Pangtanggal ng stress

6. Bawas sa risk o peligro ng osteoporosis (paglambot ng buto)

7. Bawas sa risk o peligro ng colon at breast kanser

8. Bawas sa risk o peligro ng type 2 diabetes

Dapat ay mag-set ng goal para sa sarili kung ilang minuto maglalakad araw araw. Sana ay makapaglakad nang trenta minutos o 30 minutes araw araw. Kung hindi kaya ang isang buong trenta minutos ay puwede ring dalawang lakad na tig kinse minutos o tatlong lakad na tig sampung minuto sa iba’t ibang oras sa isang araw.

Para sa mga may diabetes, ang payo ko ay maglakad pagkatapos kumain. Rest 15, walk 15! Ibig sabihin, pagkatapos kumain ng almusal, tanghalian at hapunan ay magpahinga muna ng kinse minutos para bumaba ang kinain. Tapos maglakad din ng kinse minutos. Pataas kasi ang asukal sa dugo pagkatapos kumain at makakatulong matunaw ang asukal sa dugo sa paglalakad dahil ginagamit ng muscles ang asukal sa pagkilos.

Magpaalam sa doktor kung puwede ba ang brisk walking sa inyo lalo na kung may altapresyon, diabetes o sakit sa puso. Huwag ring piliting lumakad nang matagal o mabilis kung hindi naman nakasanayan.

Kapag sinabing brisk walking, gaano kabilis dapat ang lakad? Sa brisk walking, kaya mo pang magsalita pero hindi ka na puwedeng kumanta.

O, saan ang lakad mo? 🙂

 

 

 

Share

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.