Ang kaalaman sa website na ito ay hindi maaring ituring na personal na rekomendasyon para sa inyong kalusugan. Ito ay para lamang sa edukasyon ng publiko. Hindi ito maaaring humalili o ipalit sa pagkonsulta sa inyong doktor. Ang pagbasa ng mga impormasyon sa website na ito ay hindi nangangahulugan na pasyente ka ni Dok Bru.

Ang lahat ng nakasulat dito ay napapasailalim sa isang Creative Commons Share Alike Attribution Required Noncommercial license.

 

 

Happy New Year sa lahat! At siyempre sa pagbubukas ng bagong taon ay nag-iisip tayong lahat kung ano ang mga gusto nating gawin nang iba para sa 2018. May New Year’s resolutions na ba kayo? Ayon sa CDC,

Make Health Your Resolution in 2018.

May anim na tips ang CDC para sa inyong kalusugan para sa 2018. Isinalin ko ito sa Filipino para sa inyo, at dinagdagan din ng sarili kong kuro-kuro.

  1. Magpa-appointment para sa check-up, pagbabakuna o screening. Ang regular na eksaminasyong medikal ay nakakatulong na mahanap ang ilang puwedeng maging problema sa inyong kalusugan bago pa ito magsimula. Mas maagang matutuklasan ang mga problema sa kalusugan kung kelan mas madali pa itong gamutin and puwede pang gumaling. Depende sa inyong edad, history ng mga sakit sa pamilya, mga dating naging sakit o mga kasalukuyang sakit kung ano ang mga tests na kailangang gawin, o kung anong mga bakuna ang kailangan. Magpatingin sa inyong doktor para malaman kung ano ang nararapat. Sa aking clinic, malimit makalimutan ng mga pasyente ang pagpapatingin sa dentista. Kadalasan ay nagpupunta na lang sa dentista kapag may sumasakit na ngipin na.
  2. Maghugas ng kamay gamit ang sabon at tubig para maiwasan ang pagkalat ng impeksyon o sakit.
  3. Piliing kumain ng diet na makalulusog sa katawan. Subukang kumain ng mas maraming prutas, gulay, whole grains, fat-free o low-fat na gatas o dairy products. Kasama rin sa healthy diet ang lean meat, manok, isda, beans, itlog, nuts. Bawasan ang saturated fat, trans fat, cholesterol, asin at asukal. Naku, ‘yan talaga ang challenge ngayong bagong taon pagkatapos nating kumain nang masagana noong kapaskuhan! Natatawa nga minsan ang mga pasyente kong may diabetes kapag sinasabi ko noong nakaraang taon kung gusto ba nilang mag-follow up sa Enero o Pebrero na lang para hindi na puwedeng sisihin ang Pasko.
  4. Maging aktibo! Dahan dahan lang. Ang pinakamadaling umpisahan ay ang paglalakad. Gamitin ang hagdanan imbes na elevator. Ouch! Tinamaan yata ako dun dahil pitong palapag ang ospital kung saan ako nagra-rounds. Puwede ring bumaba sa mas malayong kanto o magpark ng kotse nang mas malayo sa pupuntahan para makapaglakad. Alam ninyo ba na may isang unibersidad sa Singapore kung saan ang parking slots nila ay depende sa edad? Ang mas matatandang propesor lang ang puwedeng pumarada malapit sa entrance para mas makapaglakad ang mga nakababata papasok sa eskwelahan. Ayon sa rekomendasyon ng CDC, dapat makapaglakad ang mga taong edad 18 pataas ng 2 oras at trenta minutos kada linggo.
  5. Maging smoke-free. Tigilan na ang paninigarilyo!
  6. Matulog nang pito hanggang walong oras tuwing gabi. Nyek, tinamaan na naman ako doon dahil sa gabing gabi na ako kung matulog. Ayon sa CDC, ang kakulangan sa pagtulog ay may kinalaman sa iba’t ibang mga sakit tulad ng type 2 diabetes, sakit sa puso, obesity (sobrang timbang) at depresyon. Gusto mo bang magbawas ng timbang? Matulog nang maaga!

Anu-ano ang mga New Year’s resolution(s) ninyo tungkol sa inyong kalusugan? Mag-iwan ng comment, para malaman ng iba at matulungan kang matupad ang mga ito.